Preestrea de O instante eterno no Cineuropa

Dentro do Cineuropa, o festival de Cine que acolle a cidade de Santiago de Compostela entre o 7 e o 29 de novembro, terá lugar a preestrea de O instante eterno, o documental de Xosé A. Cascudo sobre Xosé María Díaz Castro, autor homenaxeado co día das letras galegas 2014. Trátase dun wok-in-progress (montaxe non definitiva) do documental, que se estreará oficialmente o 19 de febreiro do 2014, data da efemérede do centenario do poeta de Gutiriz.

A sesión complétase coa proxección das dúas primeiras pezas da serie de curtametraxes inspiradas no mítico poemario de Díaz Castro, o “Proxecto Nimbos”: Ínsula de David Castro e Cova alumada de Xurxo Chirro.

A proxección desta versión provisional de 64 minutos terá lugar no auditorio do Centro Galego de Arte Contemporánea, en Santiago de Compostela ás 16.00 h. con entrada de balde ata completar o aforo. Despois do visionado haberá un debate na sala co director do filme.